كتب / رؤوف قـــنــــش.
فى زيارة مفاجئة قام بها محافظ الدقهلية السيد المحاسب حسام الدين إمام لمدرسة إبتدائية فى قرية ميت مزاح والتى تبعد عن المحافظة حوالى 3 كيلو متر تقريبا وما أجمل أن تكون الزيارة مفاجئة حتى يضع يدة على الأخطاء الموجودة فى المنظومة التعليمية وهى كثيرة وتنحصر فى غياب المدرسين وتقاعسهم أثناء أداء واجبة نحو الطلاب وأيضا تكدس الطلاب فى الفصول حتى يصل عددهم ويتجاوز الخمسين طالب ومناهج عفا عليها الزمن والتطوير مازال يبحث عن طاقة نور وأعتقد ويعتقد الكثيرون أنها طالت وتوسمنا خيرا فى زيارة السيد المحافظ للمدرسة الإبتدائية فى أن يدخل الفصول ويتحدث للتلاميذ ويناقش المدرسين ويتحاور مع مديرى المدرسة وكيفية النهوض بالعملية التعليمية وسبل التطوير والقضاء على الأفكار البالية التى مر عليها عقود من الزمن وما ذالت راكدة ولكن السيد المحافظ ترك كل هذا وذاك والتفت فقط لدفتر الحضور والإنصراف ليعرف من حضر ومن لم يحضر فى هذا اليوم وقام بتوقيع الغياب على 83 مدرس وموظف لم يحضروا فى هذا اليوم حول هذة الزيارة وكيف رأها جمهور المتابعين وكانت كالأتى .
فى البداية يقول الأستاذ شوقى الإمام إحنا عمالين ندور علي الحضور والإنصراف والنظافه والهيافه وسايبين اساس الموضوع التعليم فيه طلبه في سنه 6 ومبتعرفش تكتب اسمها فيه طلبه في دبلوم وما يعرفوش السما من العما المهم كلنا نغطي لامؤخذه بورقه عموما تحيه للسيد المحافظ وعايزين زيارات مفاجئه لكل مكان في البلد .
الأستاذ احمد اسماعيل يقول البركه فى أولياء الأمور هم السبب بدل ما يعرف مستوى ابنه يطلب الوساطه علشان يغششوه فى اللجنة مع العلم بأن النظافة من أساس التعليم ايه الفائدة أنى أعلمه وهو مريض .
ويقول الأستاذ صلاح السيد المدرسه ممكن يكون فيها مدرسين وعمال فعلا انت فاكر ان المدرسه بيكون فيها مدرس واحد للغة العربية ممكن يكون فيه 4 و5 مدرسين فى مدرسه لمادة واحده وحسب عدد الفصول فيه مدراس فيها اكتر من كدا بالعمال .
الأستاذ طارق النشوى يقول سؤال هو المفروض إن المدرس ينظف بنفسه المفروض فى المدرسة عشر عمال على الأقل مثبتين تلاقى الموجود اربعه عمال بالأجر وأجر الواحد لايتعدى 250 جنيها فقط يعطى شغل على قدهم يحاسب مدير المدرسة على النظافة والمدرسين أهم شيئ عندهم الدروس الخصوصية علشان يعوضوا قلة المرتب يكتب المدير شكوى فيهم يلاقى شكوى تكتب من المدرسين ذوى المصلحة الواحدة ضده ممكن يتنقل فيها والله اكتر من وانا منهم اتقدم بطلب نقل للعمل فى الادارة التعليمية ويرفض مدير الادارة الطلب طبعا ماهو لازم يكون فى حد يشيل الليلة وياخد الجزا وكمان تم الغاء حوافز مدير المدرسة ليه ماحدش بيفكر فى ذلك .
ويقول الأستاذ رفعت السعودى أسلوب السيد المحافظ فيه امتهان للسيد مدير المدرسة أين أنت من رحم الله امرئ أهدى الي عيوبي وصديقي وكيل الوزاره لاارى لك خطه واضحه في ظل قيادتك للتعليم في الدقهليه ياسادة الحضور والانصراف ليس المشكله المهم الأداء وكيفية ربط الطالب بالمدرسه مع الاستفاده لك الله يامصر .
الأستاذ احمد وهبة يقول محافظتين من اسوء محافظات مصر فى التعليم الشرقية والدقهلية مافيش مدرسبن ولا طلبة بيروحوا المدارس طيب المدرسين بيجوا يمضوا حضور وانصراف لية ؟ علشان المرتب الحرام الله لا يوفق كل مدرس ماعندوش ضمير لانه المفروض صاحب رسالة من اعظم المهن هو بناء شخصية الأجيال .
ويقول الأستاذ مصطفى شيبوب الله يعينك يا سيسي انت عمال تلف الدنيا من أجل رفعة مصر واهلها بيلفوا ويدوروا في الشوارع مزوغين من أعمالهم وبقبضوا الآلاف ومافيش ضمير أين القانون ؟اين الرقابة الإدارية ؟ لما يأخذوا كل هذة المرتبات ولا يعملون اين انت يا رئيس كوريا الشمالية ؟ تنفع تيجي مصر لمدة يومين وتخلصنا من الموظفين المزوغين ولك الأجر والثواب .
الأستاذة عفاف الحسينى تقول النظافه ينظف المدرس الحضور يحضر المدرس الضرب ينضرب المدرس التطاول يتطاول على المدرس شكرا دولتنا اللى سايبه التعليم أهم قضيه وبتفرغه من مضمونه لو عاوزين تعليم بجد مش هتعملوا كده محافظ يتكلم فى أمور إداريه وتسليم وتسلم نبحث عن مخرج .
ويقول الأستاذ خالد عرفة للأسف الشديد إحنا بندور علي الهيافة زي السيد المحافظ المحترم نظافة وحضور وانصراف علي اساس ان المدرسة في مدينة مش فى قرية وماشاء الله علي النظافة في مصر كلها والأرض مش مرصوفة حاجة تجنن وان كانت مشكلة المدرسة في الحضور والإنصراف بس دي تبقي ممتازة والله وسوء الأدب في معاملة مدير المدرسة بيقولة اتفضل وكأنة شغال عنده واحنا مانعرفش شعب فرعون مافيش فايدة أعطانى إحساس إنة وزير التعليم مش محافظ .
الأستاذة رضا محمود تقول إحنا محتاجين تفتيش عل المدرسين اللى قاعدين عل التخت وقت الحصه ومفيش شرح ولا إهتمام عل الواجبات والطلبة بيصححوا مع بعض الواجبات وميعرفوش اي حاجه فى المنهج إرحمونا تعبنا من المدرسين .
ويقول الأستاذ سعد رياض وليه يفاجئهم كده هيخضهم ماهى معروفه روح بعد صلاة الظهر اى مصلحه حكوميه نصهم ماحضرش أصلا والنص التانى صلى الظهر ومشى والغريب إنه بيصلى .
الأستاذ احمد محمود يقول من يملك العقاب يملك الثواب تتكلم عن النظافه بيقولك مفيش الا عامل واحد بيقوله انت نظف يعنى ينفع مدير المدرسة هوة اللى ينظف أمال العامل دورة إية محتاج أفهم
سوء توزيع مفيش عمال وفى الاخر يقوله موقوف عن العمل مش فيه شئون قانونيه .
ويقول الأستاذ احمد منصور المشكله كمان مشكله ايه ده كله مشاكل وعايزين نبقي دوله متقدمه في التعليم وناخد مركز عالمي اشتغلو يا مصريين الا من رحم الله .
